चरखा आणि बापू

चरख्याबरोबर दुसऱ्या कोणाचा फोटो टाकला म्हणून दुःख नाही, निषेध नाही, अशाने काही फरकही पडत नाही...

कुठे कोणता फोटो टाकायचा हा त्या designer च्या अभिव्यक्ती स्वातंत्र्याचा प्रश्न असल्याने ते फोटो नष्ट करावेत, त्यावर बंदी घालावी अशी जराही इच्छा नाही, तशी मागणीही नाही...

यानिमित्ताने बापूंचे आम्हाला पुन्हा एकदा स्मरण झाले, हे ही काही कमी नाही...

याआधीही असे बऱ्याच लोकांचे फोटो होतेच म्हणे... 
चरख्यामागे बापू असोत, मी असो, तुम्ही असो, मोदी असोत, नाहीतर कोणी गांधी नावाचा दुसरा कोणी असो, चरख्यातून तर सूतच निघणार आहे...

चरखा चालवून सूत काढण्याचं बापूंकडे काही 'पेटंट' नाही...
या निमित्ताने, हे काही लोक बापूंच्या मार्गावर चालण्याचा प्रतिकात्मक तरी प्रयत्न करत आहेत! यात आक्षेप असण्याचं काही कारण नाही... आनंदच आहे...

आजच्या काळात चरखा ही वस्तू किती relevant आहे, हाच एक मोठा प्रश्न आहे...

यातून जरी भविष्यात कुणाचा असा समज झाला की सूत कातून स्वावलंबनाचा संदेश दुसऱ्याच कोणीतरी दिला, सर्वसामान्य लोकांना एकत्र आणून इंग्रजांविरुद्ध सत्याग्रहाची प्रेरणा दुसऱ्याच कोणीतरी दिली तरी काही हरकत नाही, आम्हालाही हरकत नाही, बापूंना ही हरकत नसावी...

आम्ही त्यांना विसरून गेलो तरी त्यांची हरकत नसावी, कारण शेवटी गरज पडली आणि आम्ही शोध चालू केला की हे दिखाऊ मुखवटे आपोआप गळून पडतील आणि खरे बापू आम्हाला भेटतीलच...

कुठेतरी आमच्याच मनातल्या अडगळीत....